Deall atgyfeiriadau

Daw atgyfeiriadau at Choice Care o bob math o bobl a ffynonellau – Gweithwyr Cymdeithasol, ysgolion neu golegau, teuluoedd a phobl sy’n chwilio am gefnogaeth.

Beth bynnag yw’r llwybr, gall y broses o ddod o hyd i’r gefnogaeth gywir ymddangos yn gymhleth gan ei bod yn llawn ffurflenni, camau a gweithwyr proffesiynol i siarad â nhw.  Ond, yn Choice, o’r ‘helo’ cyntaf i phan fyddwch chi’n symud i mewn, rydyn ni gyda chi bob cam o’r ffordd i wneud i bethau deimlo ychydig yn haws a chanolbwyntio ar beth sydd wir yn bwysig – chi.

Y cyfan sydd ei angen arnom i ddechrau arni yw rhai manylion cyflym. Gallwch ffonio, e-bostio neu gwblhau’r Ffurflen Atgyfeirio i gysylltu â’n Tîm Atgyfeiriadau pwrpasol.

Efallai bod gennych nodiadau manwl neu gynllun gofal yn barod, neu efallai eich bod newydd ddechrau ystyried eich opsiynau.

Y naill ffordd neu’r llall, byddwn ni’n cwrdd â chi ble bynnag ydych chi, yn gwrando’n ofalus, yn ateb eich cwestiynau ac yn edrych ar ba fath o gefnogaeth sy’n teimlo’n iawn i chi.

Cyn i ni gymryd y cam nesaf, rydyn ni’n hoffi cysylltu â’ch Gweithiwr Cymdeithasol neu’ch Awdurdod Cyllido i roi rhybudd iddyn nhw a gwneud yn siŵr eu bod yn rhan o’r sgwrs.

Byddwn ni’n cadw mewn cysylltiad â chi ar bob cam, fel eich bod bob amser yn gwybod beth sy’n digwydd nesaf.

Nesaf mae’r hyn sy’n cael ei alw’n aml yn “asesiad”, ond mae’n well gennym ni feddwl amdano fel sgwrs hamddenol a phersonol. Gall ddigwydd ble bynnag rydych chi’n teimlo’n fwyaf cyfforddus – wyneb yn wyneb, dros y ffôn neu drwy alwad fideo.

Dyma’n cyfle ni i ddod i’ch nabod chi – nid dim ond eich anghenion, ond pethau rydych chi’n eu hoffi, ddim yn eu hoffi, eich personoliaeth a’ch dymuniadau ar gyfer y dyfodol. 

Byddwn ni’n sgwrsio am bethau fel:

• Beth sy’n bwysig i chi o ddydd i ddydd: eich arferion, eich diddordebau a’ch dewisiadau
• Pa fath o gefnogaeth sy’n eich helpu i deimlo ar eich gorau
• Pan mae pethau’n teimlo’n anodd, sut allwn ni wneud i chi deimlo’n ddiogel a hyderus
• Y bobl, y lleoedd a’r gweithgareddau sy’n eich gwneud chi hapusaf
• Ble ydych chi’n gweld eich hun yn ffynnu (yn cofleidio prysurdeb bywyd y ddinas neu’n encilio i gefn gwlad neu’r arfordir?)

Mae’n bwysig cofio, nid oes atebion cywir neu anghywir. Y peth pwysig yw deall sut y gallwn eich cefnogi chi i fyw’r bywyd rydych chi eisiau ei fyw, mewn ffordd sy’n teimlo’n iawn i chi.

Ein cam ni sydd nesaf. Byddwn ni’n archwilio’r opsiynau yn syth ac yn gweithio ochr yn ochr â Rheolwyr Cartrefi i ddod o hyd i rywle y gallech chi ei alw’n gartref.

Yna cewch eich gwahodd i ymweld â’r cartrefi hyn, cael blas ar fywyd yn Choice, a chwrdd â’r tîm a’r bobl sy’n byw yno.

Rydyn ni eisiau i chi, a’ch anwyliaid, allu dychmygu eich hun yn byw yno: yn gyfforddus, gyda chefnogaeth, ac wedi’ch amgylchynu gan bobl rydych chi’n ymddiried ynddynt.

Pan fyddwch chi wedi dod o hyd i rywle sy’n teimlo fel cartref, byddwn ni’n siarad â’ch Gweithiwr Cymdeithasol neu’ch Tîm Cyllido ac yn cyflwyno llythyr cynnig a fydd yn cael ei gyflwyno i’r panel i’w gymeradwyo.

Bydd ein Tîm Atgyfeiriadau a’ch Rheolwr Cartref newydd yn gweithio i gadw pethau i fynd ac ateb unrhyw gwestiynau sydd gennych chi fel eich bod chi’n teimlo eich bod chi’n cael eich cynnwys a’ch cefnogi. Unwaith y byddwn wedi cael y ‘golau gwyrdd’ a bod y cyllid wedi’i gymeradwyo, bydd pawb yn torchi’u llewys i’ch cefnogi i symud i mewn i’ch cartref newydd!

Mae symud i gartref newydd yn foment fawr – digon o gyffro ond weithiau ychydig o nerfau hefyd – ond byddwn ni’n cynllunio’r broses yn ofalus, ar eich cyflymder chi.

Byddwch chi’n cael cymaint o amser ag sydd ei angen arnoch chi i ddod i nabod eich amgylchedd newydd, eich tîm cymorth a’ch cyd-aelodau yn y cartref! Mae ein ffocws yn parhau i fod ar eich helpu i ymgartrefu a theimlo’n hyderus a chyfforddus.

Wrth gwrs, dim ond dechrau’r bennod nesaf hon yw symud i mewn. Byddwch chi’n parhau i fod wedi’ch amgylchynu gan bobl sydd wir yn credu ynoch chi. Oherwydd, i ni, nid ble rydych chi’n byw yw’r unig beth pwysig, ond sut rydych chi’n byw, ac rydyn ni yma i’ch cefnogi.

I wneud atgyfeiriad neu ddysgu mwy, cysylltwch â’n tîm atgyfeiriadau pwrpasol heddiw.